Komenciĝas la Universala Kongreso en Aruŝo. Laŭ la retejo de UEA 837 homoj el 66 landoj aliĝis al la kongreso. Multaj el la eŭropaj aliĝintoj tamen ŝajne ne alvenis al la unua afrika UK. En sabato okazas la jam tradicia movada foiro.
La unua afrika Universala kongreso komenciĝas hodiaŭ sabate en Aruŝo, Tanzanio. La kongreso estas malgranda, sed ne rekorde malgranda, ĉar partoprenas multaj afrikanoj, plejparte el Tanzanio kaj najbaraj landoj kiel Kenjo, DR Kongo kaj Burundo, sed ankaŭ el okcidenta Afriko, de kie la vojaĝo estas same komplika kiel el pluraj eŭropaj landoj.
Multaj eŭropanoj, kiuj aliĝis al kongreso, efektive ne venis, kio ankaŭ emfazas la kvanton de afrikanoj.
Multaj el la afrikaj partoprenantoj estas komencantoj, sed estas ankaŭ multaj kiuj flue parolas Esperanton, kaj kiuj nun partoprenas sian unuan universalan kongreson de Esperanto.
La vetero en Aruŝo estas momente nuba kaj pluveta, la temperaturo sabate tagmeze atingis nur 18 gradojn, kio por multaj eŭropanoj estas malvarme kompare al la temperaturoj en iliaj hejmlandoj ĉi-somere.
La movada foiro okazos ekstere, la tabloj estas jam lokitaj. Espereble ne pluvos kiam ĝi okazos vespere. La veterprognozo nun ne antaŭvidas pluvon.
La unuaj impresoj pri Aruŝo estas kutimaj por la evolulanda urbo. Multe da stratvendistoj, trafiko iom malorda, multaj mopedoj sed ankaŭ bicikloj, etaj vendejoj. Vendistoj estas iom tro aktivaj proponante siajn produktojn por turistoj, sed ĝenerale la urbo donas sekuran kaj funkciantan impreson.
La kongresa programo aspektas iom malpli abunda ol kutime, tamen en la programo estas multaj el la kutimaj eroj. La komitato kunvenas nur unu foje dum la semajno. Ne klaras, ĉu mankas eroj por la tagordo, aŭ ĉu la celo estas malaktiviigi diskuton kaj eventualan kritikon, ekzemple pri la sorto de libroservo aŭ pri la vendo de la oficeja domo.
Jukka Pietiläinen