Al la Telegrama kanalo “Esperanto-novaĵoj” ĵus aliĝis la centa abonanto. Tiu informo aperis la 24-an de septembro en la novaĵretejo La Ondo de Esperanto, sed tuj en postskribo oni aldonis, ke intertempe oni jam atingis la nombron de 101 abonantoj. Tri tagojn post apero de tiu informo, la nombro estis 176.
Telegramo estas senpaga tujmesaĝilo por komputiloj kaj poŝtelefonoj. Esperantistoj uzas ĝin por sendi tekstajn kaj voĉajn mesaĝojn, kaj por telefonvoki aŭ videovoki aliajn parolantojn. Eblas sendi per ĝi ĉian enhavon: bildojn, filmetojn, movbildojn, glumarkojn kaj dosierojn.
En Telegramo funkcias grupoj, en kiuj esperantistoj interparolas pri diversaj temoj, kaj kanaloj. Kanalo estas unudirekta loko kun mesaĝoj pri difinita temo. Ĉiu kanalo havas specifan temon. Malkiel grupo, kanalo normale ne estas loko por diskuti, sed por informiĝi pri difinita temo. Tamen ĉe la kanalo “Esperanto-novaĵoj” funkcias samnoma grupo/babilejo.
La Telegrama kanalo “Esperanto-novaĵoj” estis fondita la 13-an de julio 2023 por diskonigi mallongajn Esperanto-novaĵojn. Do, ĝi atingis cent abonantojn en nur dek tagoj. La plej “amasa” Esperanto-kanalo en Telegramo estas “Esperantaj memeoj” kun 539 abonantoj.
Se vi uzas Telegramon kaj vin interesas novaĵoj pri Esperanto kaj ties komunumo, aliĝu al la kanalo “Esperanto-novaĵoj”.