TEJO-delegacio gvidis rolludon “Kukumio” en la Eŭropa Parlamento
Dek TEJO-delegitoj sukcese gvidis rolludon, kiu faciligis profundajn konversaciojn pri lingvaj baroj kaj neegaleco
En la majesta spaco de la Eŭropa Parlamento, kie ordinare resonas la voĉoj de politikistoj diskutantaj leĝojn kaj traktatojn, aŭdiĝis ĉi-foje io tute malsama: la entuziasmaj opinioj de junuloj el la tuta kontinento, kiuj partoprenis ludon nomatan “Kukumio” por esplori la kompleksajn temojn de lingvaj rajtoj, malplimultoj kaj socia neegaleco.
La ludo estis gvidita dufoje de Tutmonda Esperantista Junulara Organizo (TEJO) en la Eŭropa Parlamento (Strasburgo) kadre de Eŭropa Junulara Okazaĵo (EJO), la 13-14an de junio 2025.
Kio estas “Kukumio”?
“Kukumio” estas speciala eduka ludo kreita por faciligi profundajn diskutojn pri delikataj sociaj temoj. La ludo funkcias kiel pont-konstruilo inter diversaj kulturaj kaj lingvaj fonoj, permesante al partoprenantoj esplori kompleksajn konceptojn pri lingvaj rajtoj kaj socia justeco en sekura kaj engaĝa medio.
La TEJO-delegitoj, agantaj kiel lud-gvidantoj, zorgis pri krei inkluzivan atmosferon kie ĉiuj partoprenantoj povis libere esprimi siajn pensojn kaj opiniojn. La ludo estis speciale adaptita por trakti la temojn de lingvaj baroj, malplimultaj rajtoj kaj neegaleco en la sama lando – ĉiuj temoj, kiuj tuŝas la koron de la Esperanto-movado.
Voĉoj de la partoprenantoj
La evento altiris junulojn el diversaj eŭropaj landoj, kiuj venis kun grandaj esperoj pri konstrua dialogo. Multaj el ili partoprenis kun la deziro ne nur lerni pri lingvaj rajtoj, sed ankaŭ dividi siajn proprajn spertojn pri lingvaj defioj en siaj hejmlandoj.
“Ĝi estis interesa rolludo, dum kiu ni povis ekzerci nian demokratian pensmanieron. Ĝi aludis realajn situaciojn en kelkaj eŭropaj landoj”, komentis unu el la partoprenantoj. “Ne estas tiom facile fari decidojn, pri kiuj ĉiuj estus kontentaj. Gravas komuniki viajn bezonojn tre klare, ĉar alimaniere povas okazi miskomprenoj”.
TEJO-delegacio en la pledangulo
En la pledangulo de EJO, “Advocacy corner”, la TEJO-delegacio ne nur gvidis la ludon, sed ankaŭ partoprenis en la pledangulo de EJO, dum kiu la delegitoj prezentis la mision de TEJO kaj klarigis, kiel Esperanto kaj la Esperanto-movado kontribuas al la solvo de lingvaj problemoj en Eŭropo kaj tutmonde.
Fonto: https://www.tejo.org/ejo-2025-tejo/
Abonu “La Ondon de Esperanto” por 2025 kontraŭ nur 15 eŭroj kaj ricevu senpage la jarkolektojn por 2023 kaj 2024. Legu pli ĉe https://esperanto-ondo.ru/Lo-abon.htm
La Ondo de Esperanto en Telegramo: t.me/esperanto_news
The post TEJO-delegacio gvidis rolludon “Kukumio” en la Eŭropa Parlamento appeared first on La Ondo de Esperanto.
Você pode gostar
Kanada filmo en Esperanto nun rete spektebla
Forpasis danĝera ul’
