Jubileo de Povilas Jegorovas

Jubileo per si mem estas nur nombro, se malantaŭ tiu nombro ne staras agoj, laboroj kaj atingoj. Tamen, se ni pensas pri Povilas Jegorovas, li vere havas kion festi, ĉar nur lia listo de diversaj meritoj en Esperantujo kaj Litovio estas kelkpaĝa.

Festi sian 70an datrevenon la mondfama esperantisto Povilas Jegorovas tute ne planis, sed ĉi-foje Litoviaj esperantistoj decidis ne obei sian prezidanton. La 15an de marto preskaŭ 40 esperantistoj el la tuta lando renkontiĝis en la restoracio “Soul” sur la urbodoma placo de Kaŭno por gratuli, rememori, danki kaj esprimi la kredon, ke Povilas daŭre laboregos por Esperanto. La festo iĝis eĉ internacia, ĉar por gratuli venis, kara por ĉiuj litovaj esperantistoj, Bīruta Rozenfelde, kiu alportis salutojn kaj donacojn de Latvia Esperanto-Asocio.

La solenaĵo komenciĝis per glaso da ŝaŭmvino, sed la unua gratulo estis surprizo de granda grupo de esperantistoj el Vilno, kiuj speciale por Povilas preparis du kantoj! La duan kanton ni ĉiuj jam povis kunkanti, sed la unua havis specialan tekston. Bona ideo de nia ĉiama ekskursgvidanto Antanas Visockas kaj de la ĉiam muzikema Vytautas Šilas!

Kia naskiĝtago sen donacoj? Povilas ricevis la honoran dankfolion de la urbestro de Kaŭno, la portreton de Povilas mem, desegnitan de la konata pentristo kaj karikaturisto Vlaber (Vladimiras Beresniovas), kiu estas persona amiko de la jubileulo kaj granda simpatianto de Esperanto. Vladimir volonte partoprenas en Litoviaj esperantistaj aranĝoj. Sekvis floroj, bondeziroj, la longa memorkarto de Litoviaj esperantistoj, kaj ni jam komencis gustumi la regalojn.

Dankfolio de la urbestro (“Al la prezidanto de Litova Esperanto-Asocio Povilas Jegorovas okaze de la 70-jara jubileo pro la multjara kaj konsekvenca laboro en popularigo de Esperanto, pro meritoj en la socia agado kaj pro famigo de la urbo Kaŭno”) kaj la portreto kreita de Vlaber.

Dankfolio de la urbestro (“Al la prezidanto de Litova Esperanto-Asocio Povilas Jegorovas okaze de la 70-jara jubileo pro la multjara kaj konsekvenca laboro en popularigo de Esperanto, pro meritoj en la socia agado kaj pro famigo de la urbo Kaŭno”) kaj la portreto kreita de Vlaber.

De tempo al tempo sonis tostoj kun bondeziroj, rememoroj kaj diversaj anekdotoj pri la multjara kunlaboro inter la malnovaj amikoj: V. Raĉkauskas, S. Sadauskaitė, M. Dilba, V. Gurskienė, S. Sidaravičius ne ŝparis bonajn vortojn. V. Budginaitė el Ŝiauliai deklamis poemon. Sonis ambaŭ lingvoj, la litova kaj Esperanto. La litova dominis en la paroladoj, sed la kantoj akompanataj de gitaro de V. Ŝilas, estis nur en Esperanto!

Kompreneble, venis la momento por la jubileulo mem paroli. Tre koncize li deklaris, ke Esperanto ekde la lernejaj jaroj estis la ĉefcelo de lia vivo. Li konfirmis, ke lia profesia laboro de advokato en Kaŭno multe helpis lin establi kontaktojn kaj ricevi subtenon de diversaj funkciuloj, sed lia ĉefa misio estas disvastigi la ideon de la internacia lingvo per eldonado, organizado de rimarkindaj aranĝoj, kaj informado tra amaskomunikiloj. Povilas konfesis, ke li ofte faris vere riskajn decidojn, precipe dum la Sovetia tempo, sed li ĉiam sciis, ke la oficialaj vojoj ĉe burokratoj estas tro temporabaj kaj ne ofte sukcesaj. Se sano kaj la situacio en la mondo permesos, P. Jegorovas ankoraŭ havos multajn grandajn planojn pri kiel vivi kaj labori por Esperanto.

Riĉa menuo kun diversaj pladoj, granda kaj bongusta torto, ĝoja etoso, ebleco revidi amikojn, babili kaj diskuti laborajn aferojn por la somera BET, kiu okazos ĉi-julie en Kaŭno – flugigis la tempon tre rapide. Ni ne rimarkis, kiel pasis pli ol kvar horoj, eble ankaŭ pro la trinkaĵoj kiujn ni rajtis elekti je la kosto de jubileulo.

La festo pasis, sed bona impreso restis, kaj ni esperas, ke ni povos renkontiĝi denove dum pliaj jubileoj de Povilas Jegorovas, kaj la vortoj el la kanto de vilnanoj plenumiĝos centprocente:

Tintas pokaloj, fluas ŝaumvino,
Regas la koron festa fascino.
Estu feliĉa, estu prospera
Kun Esperanto, stelo Espera.
(V. Šilas)

Gražina Opulskienė

Fotoj de Gražvydas Jurgelevičius

Legu ankaŭ:
Halina Gorecka, Aleksander Korĵenkov. Povilas Jegorovas – 70-jara

Ĉi tiu artikolo aperis en la novaĵretejo La Ondo de Esperanto.
Ĉe represo aŭ citado bonvolu indiki la fonton:
La Ondo de Esperanto https://sezonoj.ru/2025/03/jegorovas-2/

Abonu La Ondon de Esperanto por 2025 kontraŭ nur 15 eŭroj kaj ricevu senpage la jarkolektojn por 2023 kaj 2024. Legu pli ĉe https://esperanto-ondo.ru/Lo-abon.htm
La Ondo de Esperanto en Telegramo: t.me/esperanto_news

The post Jubileo de Povilas Jegorovas appeared first on La Ondo de Esperanto.