BET-59: Konatiĝu kun István Ertl

“La Ondo de Esperanto” daŭrigas la prezentadon de artistoj, prelegantoj, instruistoj kaj aliaj personoj, kiuj kontribuos al la programo de la 59aj Baltiaj Esperanto-Tagoj (BET-59), kiuj okazos la 5-13an de julio 2025 en la universitato Vytautas la Granda (Kaŭno, Litovio). Jam aperis dudek sep prezentoj. La dudek-oka prezentato estas István Ertl, hungara tradukisto kaj esperantisto, loĝanta en Luksemburgo.

Ĉi-sube legu pli pri li kaj pri lia kontribuo al BET-59.

István Ertl naskiĝis en Budapeŝto en 1965, en familio legema kaj amplena. Li esperas ke li gardis tiujn ecojn. Esperanton li alproprigis memlerne ekde infana aĝo, kaj poste plibonigis siajn sciojn en la Esperanto-fako de Universitato ELTE, kie li diplomiĝis kiel instruisto de lingvoj. De 1992 ĝis 2001 li redaktis la revuon “Esperanto” de UEA en Roterdamo. Post Brusela interludo (2002-03) kiel oficisto ĉe kontraŭrasisma organizaĵo, li dungiĝis kiel tradukisto en Luksemburgo ĉe Eŭropa Revizora Kortumo, kaj laboras tie ĝis nun.

Kun Fabienne Berthelot (1965-2018) István Ertl kreis familion de tri gedenaskuloj. En 2023 li edzinigis la estoninon Liina Vahtrik, kaj tiel fariĝis bo-balto, pli BET-ema ol antaŭe.

Liaj lastaj tradukoj beletraj: “Elu” (rakonto, en la estona, el Esperanto kaj la hispana, kun Liina Vahtrik); “La edzino de l’ tempvojaĝanto” (romano, el la angla), “Pri la eta talpo, kiu volis scii kiu faris tion sur lian kapon” (infanlibro, el la germana), “Maigret és az éjjeli utas” (romano, hungare, el la franca).

En Kaŭno Ertl prelegos pri la spertoj de tradukisto faka kaj beletra en la nuna mondo de aŭtomataj tradukiloj (“Kiel mi fariĝis maŝino”).

Pliaj informoj pri BET-59 (kaj pri pli fruaj BEToj) estas legeblaj en nia novaĵretejo.

Ĉi tiu artikolo aperis en la novaĵretejo La Ondo de Esperanto.
Ĉe represo aŭ citado bonvolu indiki la fonton:
La Ondo de Esperanto https://sezonoj.ru/2025/03//

Abonu La Ondon de Esperanto por 2025 kontraŭ nur 15 eŭroj kaj ricevu senpage la jarkolektojn por 2023 kaj 2024. Legu pli ĉe https://esperanto-ondo.ru/Lo-abon.htm
La Ondo de Esperanto en Telegramo: t.me/esperanto_news

The post BET-59: Konatiĝu kun István Ertl appeared first on La Ondo de Esperanto.