La 6a Speciala Ekskurso en Nepalo

Sukcese okazis la 6a Speciala Ekskurso, organizita de la Nepala Esperanto-Asocio (NEspA), kiu daŭris de la 26a de februaro ĝis la 8a de marto 2025. Ĝi estis la unua vere fruktodona programo por la Esperanto-movado en Nepalo ekde la komenco de la koronvirusa pandemio. NEspA efektive instruis multajn nepalanojn, utiligante la okazon. Entute, dudeko da esperantistoj partoprenis la tutan programon, kaj simila nombro aliĝis al diversaj partoj de la ekskurso.

La partoprenantoj inkluzivis du personojn el Rumanio, du el Bulgario, du el Ruslando, kaj po unu el Germanio, Svedio, Nov-Zelando, Hispanio kaj Aŭstrio. Ĉiuj aliaj estis nepalanoj. La ĉi-jara programo celis inviti esperantistojn de ĉiuj aĝogrupoj por ĝui famajn lokojn en Nepalo kaj samtempe antaŭenigi la enlandan Esperanto-movadon. Efektive, ĝi fariĝis vere fruktodona por la loka movado. Dum la ekskurso, la partoprenantoj kuraĝigis homojn lerni Esperanton, interŝanĝi ideojn kaj sciojn, kaj konigi sian propran kulturon. Krome, ĉiuj espereble akiris sperton pri interkultura komunikado. La programo estis aparte speciala pro la koncerto de la famaj esperantistaj gekantistoj Ĵenja kaj Tomio el Germanio kaj Svedio.

La programo komenciĝis la 26an de februaro kun akcepto de la gastoj. NEspA formale bonvenigis ilin vespere de la 27a en la hotelo “Marsyangdi” en Tamelo. La prezidanto de NEspA, Bharat Kumar Ghimire, kune kun la ĉefo de la renkontiĝo, L. P. Agnihotry, kaj la antaŭaj prezidantinoj, Indu Devi Thapaliya kaj Maya Rai, esprimis bondezirojn al la partoprenantoj. Ankaŭ la kunfondinto de la renkontiĝo, Philip Pierce, ĉiuj ĉeestantaj nepalaj esperantistoj kaj la 11 eksterlandaj gastoj esprimis siajn bondezirojn.

NEspA ricevis bondezirmesaĝojn el diversaj partoj de la mondo; multaj bondeziroj estis ricevitaj per la Facebook-paĝo de NEspA. La programo estis kondukita de Nabaraj Buddha, kaj Punya Prasad Acharya oficiale bonvenigis la gastojn. Granda nombro da novaj esperantistoj partoprenis la eventon, inkluzive de pluraj infanoj.

La dekunu-taga programo komenciĝis per du tagoj dediĉitaj al vizitado de la Katmandua Valo. La grupo vizitis la sanktejojn Pashupatinath kaj Baudhanath. La 28an de februaro la grupo veturis al Bhaktapuro, historia urbo fama pro sia etno kaj elstara kulturo.

La 1an de marto, la partoprenantoj vojaĝis al Ĉituxan Nacia Parko, sudokcidente de la Katmandua Valo, kie ili restis du noktojn. Ili ĝuis ĵipan vojaĝon, boatadon, kulturan programon kaj aliajn agadojn, inkluzive de elefanta rajdado. Ili ankaŭ povis vidi rinoceron de tre proksime en ĝia natura loĝloko. La grupo tranoktis en hotelo konstruita laŭ tradicia maniero, kio ebligis al la partoprenantoj pli bone konatiĝi kun la loka vivstilo, manĝaĵoj, vestaĵoj kaj aliaj aspektoj de la vivo en nepalaj vilaĝoj en la suda parto de la lando.

La 3an de marto frumatene la grupo ekvojaĝis al Lumbini, la naskiĝloko de Budho. Ili vizitis diversajn templojn kaj ĝardenojn. La ĉefa loko estis la preciza loko de la naskiĝo de Budho. La 4an de marto la grupo vizitis Palpa, malgrandan montaran vilaĝon, kie ili esploris lokan bazaron kaj vizitis la Reĝinan Palacon (Rani Mahal), situantan apud la rivero Kaligandaki.

La saman tagon, la partoprenantoj alvenis en la turisma urbo Pokhara, kie ili pasigis tri tagojn vizitante diversajn vidindaĵojn. Ili boatis en la bela lago Pheva kaj ĝuis spektaklajn vidpunktojn. La 5an de marto, ili supreniris montetan kreston por vidi la famajn montojn Machhapuchhare, Annapurna kaj Dhaulagiri. Tamen la 6an de marto la vetero ne estis favora, kaj ili ne povis vidi la Himalajon. Tamen, ili ĝojis, ke ili ne restis en Palpa kaj povis vidi la montojn en la antaŭa tago. La 7an de marto la grupo revenis el Pokhara al Katmanduo.

La 8an de marto okazis adiaŭa vespero en la salono de la hotelo “Marsjangdi”, finiĝinta per vespermanĝo. Ĉiuj parolantoj dankis la organizantojn pro la Speciala Ekskurso. NEspA ricevis sugestojn kaj konsilojn de la gastoj. La prezidanto de la Aŭstria Esperanto-Asocio, Ewald Schick, la prezidantino de la Rumana Esperanto-Asocio, Mariana Pitar, la bulgara esperantistino Raia Androvska, la rusa esperantistino Olga Ŝevĉenko, kaj la esperantisto el Nov-Zelando, Sophie Henderson, faris specialajn sugestojn kaj promesis kunlaboron en estontaj projektoj. La ĉeestantoj ĝuis la koncerton de Tomio kaj Ĵenja. Atestiloj estis disdonitaj al la partoprenintoj, kaj ĉiuj eksterlandaj gastoj esprimis kontenton pri la vojaĝo.

Ni dankas ĉiujn organizojn, individuojn kaj partoprenantojn, precipe Little World Pre School kaj Koteshwor Multfaka Kolegio, kiuj kontribuis al la sukceso de ĉi-jara Speciala Ekskurso. Kvankam la nombro da partoprenantoj ne estis tre granda, ni sukcesis kunveni el naŭ landoj. Homoj miris, vidante nian vere interkulturan grupon kaj interesiĝis pri Esperanto. Tio pruvas, ke renkontiĝoj estas la vera koro de la movado.

La ĉefa sukceso estis, ke multaj nepalanoj, kiuj jam eklernis Esperanton, vere sentis, ke ĝi funkcias en praktiko. Iuj partoprenantoj, kiuj antaŭe ne parolis Esperanton, komencis uzi ĝin dum la ekskurso. Ĉi-jare nia temo estis “Revivigo, popularigo kaj interkultura kuniĝo”, kaj ĝi efektive sukcesis.

Bharat Kumar Ghimire
prezidanto de Nepala Esperanto Asocio

Ĉi tiu artikolo aperis en la marta (printempa) eldono de La Ondo de Esperanto (2025).
Ĉe represo aŭ citado bonvolu nepre indiki la fonton:
Papere: La Ondo de Esperanto, 2025, №1 (323).
Rete: La Ondo de Esperanto https://sezonoj.ru/2025/03/nepalo-3/

Abonu La Ondon de Esperanto por 2025 kontraŭ nur 15 eŭroj kaj ricevu senpage la jarkolektojn por 2023 kaj 2024. Legu pli ĉe https://esperanto-ondo.ru/Lo-abon.htm
La Ondo de Esperanto en Telegramo: t.me/esperanto_news

The post La 6a Speciala Ekskurso en Nepalo appeared first on La Ondo de Esperanto.